Liston gigamit sa paghikog

CEBU, Philippines – Patay na nga nadiskubrehan sulod sa lawak sa ilang panimalay ang usa ka tawo nga gituohang naghikog pinaagi sa paghigut og liston sa sapatos sa iyang liog sa Ceniza Compound, Maguikay, dakbayan sa Mandaue alas 7 pasado ang takna sa buntag niadto’ng Domingo.

Si Police Officer 3 Antonio Discarten niingon nga ang mga sakop sa Investigation Detection and Management Bureau (IDMB) sa Mandaue City Police Office (MCPO) ang nihimo sa imbestigasyon.

Giila ang namatay nga si Adonis Cortes Arrofo, 36-anyos, minyo ug ang 8-anyos nga anak lalaki ang una’ng nakadiskubre sa patay’ng lawas sa iyang amahan nga nagbitay.

Matud ni Discarten nga nakaplagan sa mga sakop sa IDMB ang suicide note nga ilang gituohan nga gihimo kini sa namatay sa dayun hikog.

Ang mga sakop sa pamilya dili pa makahatag og pamahayag sa gihambin nga suliran sa namatay. – /GMR) (BANAT NEWS)