Dugang 2 ka kawani sa CH positibo sa drugas
CEBU, Philippines – Positibo sa paggamit sa ilegal nga drugas ang duha ka kawani sa Cebu City Hall atol sa random drug testing nga gipasiugdahan sa City Office for Substance Abuse Prevention (COSAP) sa niaging semana.
Matud ni Dr. Alice Utlang, executive director sa COSAP, nga iya na nga giduso sa Human Resource and Development Office (HRDO) ang resulta sa drug test alang sa tukma’ng aksiyon. Niadtong Enero, adunay upat ka empleyado ang nagpositibo sa ilegal nga drugas. Duha niini ang nataktak sa serbisyo, ang usa mahuman ang kontrata karong Marso ug ang usa gipaubos sa imbestigasyon tungod kay regular nga kawani.
Sa kasamtangan, aduna na’y 20 ka empleyado sa dakbayan ang nagpositibo sa paggamit og ilegal nga drugas.
Matud ni Utlang nga nagpahigayun na sila og daghang seminars aron ma-edukar ang mga empleyado nga mapalayo sa ilegal nga drugas.
Apan matud niya nga ang resulta sa drug testing dili makalipay kay aduna gihapo’y nagpositibo.
“Atong seminars atong i-course through sa HR nato kay part sa ila ang training and assessment sa empleyado sa siyudad,” matud niya. – /GMR) (BANAT NEWS)
- Latest
