Polis paum-umon unta

CEBU, Philippines – Nagtingkagol sa Mabolo Police Station ang usa ka Nigerian national human kini gisikop sa usa ka opisyal sa kapolisan nga gisuwayan unta niya og paum-om sa iyang kinatawo sud sa kasilyas sa parking sa usa ka mall sa nakalabay nga hapon.

Ang dinakpan naila nga si Ghukmelie Ezeal, 30, temporaryo nga nagpuyo sa Missionary sa Barangay Talamban ning dakbayan sa Sugbo.

Ang 52-anyos nga reklamanteng polis, usa ka Inspector nga nadestino sa dakbayan sa Sugbo ug luyo-luyong hepe sa usa ka presinto nga dili gustong magpahingalan.

Sa pakighinabi sa Banat News sa opisyal, kini mibutyag nga mogamit unta siya sa kasilyas  ug iyang nakita sa sulod ang langyaw nga nangihi sa urinal bowl, hinungdan nga didto siya sa inidoro nangihi.

“Pagsulod naku nangihi siya sa urinal miingon pa ku nga “sorry”, ingon pod siya, its okey, pagpangihi naku sa bowl pag-atubang naku naa na siya nagbarog nagpagawas sa iyang kinatawo. Iyang gihawiran ang akong ulo gipaduol sa iyang kinatawo,” saysay pa sa maong polis.

Dali niyang giwakli ang langyaw ug gisitar sa gibuhat niini dayong paila nga siya usa ka polis.

“Ako siya nga giingnan nga I am a police officer, iya man hinuon ko nga giingnan nga “oh you are a police officer you are idiot, foolish, a monkey,” hinungdan nga giingnan niya kini nga iyaha kining arestuhon.

Apan dihang iyaha na untang kuptan, misukol ang suspek ug gitukmod siya niini. Nalupig sa kusog ang polis tungod sa gidak-on sa suspek nga 6’3 ang height ug dako’g lawas samtang siya 5’4 lang ang gitas-on.

Dali dayon nga midagan ang langyaw pagawas sa kasilyas ug nahitabo ang ginukuray, hangtud nga nangayo siya og backup sa mga gwardiya maong nadakpan ang suspek diha sa mall.

Sa sulod sa buhatan sa Mabolo Police Station pwerteng luhod-luhod pagpangayo og pasaylo sa Nigerian.

Ang hepe sa Police Regional Office -7 Chief Supt. Prudencio Tom Bañas  miingon nga kinahanglang patagmon ang maong langyaw  ug buot niya nga ipa-deport kini.

“Kung ang pagtingin sa Filipino mababa, eh di turoan natin siya nang magandang pagtingin sa Filipino,” sumala pa ni Bañas.

Gisulayan pa unta og kuha sa iyang habig sa Banat News ang maong langyaw apan wala gayod kini motingog.

Kasong direct assault, oral defamation, unjust vexation ug acts of lasciviousness ang ipasaka sa kapulisan batok kaniya. – /EIM) (BANAT NEWS)