Tagduha ka oras nga brownout

CEBU, Philippines - Mipatuman og tagduha ka oras nga rotational brownout ang Visayan Electric Cooperative kagahapon tungod sa kakulang sa supply sa kuryente nga miabot gikan sa power provider niini.

Ang National Grid Corporation of the Philippines (NGCP) mipahibalo sa VECO nga nakasinati ang Visayas grid og kakuwangon sa kuryente sugod alas-9:00 sa buntag kagahapon.

Tungod niini nagkuwang ang VECO og 146 megawatts nga supply hinungdan sa gipatumang rotational brownouts.

Si Theresa Sederiosa, ang tigpamaba sa VECO miingon nga ilaha na karong giabisohan ang mga dagkong kompanya nga misanong sa Interruptible Load Program aron paandaron ang ilang kaugalingong generators aron mapasa sa VECO ang supply nga alang unta kanila ngadto sa ubang konsumidor nga way generators.

"As of now, we do not know yet when the power supply will be stable," pasabot pa ni Sederiosa.

Si Antonio Labios, regional director sa Department of Energy-7 miingon nga ang tibuok Visayas grid nagkuwang og  276 MW nga  power tungod kay napakyas pag-synchronized sa grid ang tulo ka dagkong planta sa Cebu Energy Development Corporation sa Toledo City

"Dili gyud ang planta nila ang naay problema but ang substation nila nga maoy mo transmit og power sa grid," pasabot pa ni Labios.

Malaumon si Labios nga karong adlawa mahuman sa mga engineers ang synchronization sa substations sa power grid. (Edwin Ian Melecio gikan sa The Freeman)