Coliflores mokiha gyud batok MCH
CEBU, Philippines - Desidido gyud ang pamilya’ng Coliflores nga mopasaka og kaso batok sa Mandaue City Hospital.
Kini human wala natagbaw ang bana nga si Cesar Coliflores kauban sa iyang abogado nga si Atty. Inocencio dela Cerna sa tubag sa kadagkuan sa tambalanan dihang sila nagtagbo sa buhatan ni City Legal Officer, Atty. Giovanni Tianero.
Matud ni dela Cerna nga pakyas sila pagkuha og klaro’ng tubag sa mga pangutana sa kamatayun ni Jocelyn.
Ang MCH gipasanginlan og medical malpractice sa pamilya’ng Coliflores nunot sa pagkamatay ni Jocelyn kinsa giingo’ng gidapatan sa sayop nga tambal nga wala gipaubos sa skin ug laboratory test.
Hinuon huwaton sa pamilya ang resulta sa imbestigasyon sa National Bureau of Investigation (NBI-7).
Matud ni dela Cerna nga andam na ang mga kaso nga ilang ipasaka ug kini naglangkob sa homicide, medical malpractice ug grave misconduct.
Samtang gipasalig ni Tianero nga mohimo sila og mas lawom nga imbestigasyon aron masuta kun unsa gyud ang tinud-anay nga nahitabo. (BANAT NEWS)
- Latest
