Motorcycle lane sa SRP tukoron
CEBU, Philippines - Gusto ni Mayor Michael Rama nga adunay pagamugnaon nga “motorcycle lane” diha sa South Coastal Road sa SRP aron malikayan ang dugang aksidente nga maglambigit og mga motorsiklo.
Gimandoan ni Mayor Rama ang kadagkoan sa City Traffic Operations Management (CITOM) nga makigtambayayong sa Department of Public Works and Highways (DPWH) alang sa mao nga katuyoan.
Ang kamandoan ni Rama pagpabutang og motorcycle lane sa SRP coastal road gihimo pipila ka adlaw human nga adunay Dutch national nga namatay human madam-ag ang iyang motorsiklo sa cement mixer truck.
Matud ni Rama nga iyang pahibaw-on si DPWH Secretary Rogelio Singson aron paspasan ang paghimo og motorcycle lane diha sa SRP nga usa ka national road. Adunay gipatuman karon nga lagda nga 30 ngadto sa 40 kilometros lang matag oras ang gikusgon sa dagan sa mga sakyanan nga moagi sa SRP coastal highway. Si CITOM operations officer Joy Tumulak miingon nga tumanon dayon nila ang kamandoan sa mayor.
Matud ni Tumulak nga adunay 25 ka aksidente ang natala sa SRP sukad sa Enero 24 hangtud sa Pebrero 17, ug ang 16 niini nalambigit og mga motorsiklo. (BANAT NEWS)
- Latest
