Unom ka tawo na-missing sa dagat

CEBU, Philippines - Padayon pang gipangita karon sa mga sakop sa Philippine Coast Guard ug Philippine Navy ang unom ka tawo lakip na sa usa ka langyaw nga missing sulod na sa upat ka adlaw sakay sa usa ka pumpboat nga migikan sa lungsod sa Siaton, Negros Oriental. Ang mga missing naglakip sa manag-uyab nga sila si Cristina Andig, 19 ug ang Amerikano nga si Bradley Fugate,  44 nga taga California.

Lakip sa missing mao ang timonil sa maong pumpboat nga si Elmer Sabroso, 30, ug sila si Russel Andig, 28; Rey Benitez, 23 ug Juvy Fundador.

Base sa taho nga giabangan ang pumpboat ni Bonifacio Sabroso sa manag-uyab aron managat ug kay wala may kamao modala nila sa pumpboat gipakuyog niya ang iyang anak nga si Elmer. Migikan sila pasado alas 8:00 sa buntag niadtong petsa 13 apan wa na makauli sukad niadto.

Ang Coast Guard Station Cebu na ang mipahibalo sa Coast Guard Dumaguete sa maong hitabo.

Ang search and rescue vessel nga BRP Batangas sa Philippine Coast Guard gipadala na sa lugar, ug miabag usab ang usa ka naval helicopter sa Philippine Navy pagpangita kanila.

Masaligon hinuon ang Coast Guard bisan nalunod ang pumpboat di kini maunlod ug posibleng nadala lang sila sa  sulog ug hangin sa ubang dapit. (BANAT NEWS)