Kriminal gipagawas kay dako ra kaayo sa prisohan
CEBU, Philippines – Didto sa England, usa ka kriminal nga dunay gitas-on nga pito ka tiil ug duha ka pulgada ang gipagawas na lang kay walay katre nga masigo alang kaniya sa prisohan.
Imbes nga matanggong sa bilanggoan, si Jude Medcalf, 23, gipahamtangan na lang og silot nga unom ka bulan nga curfew ug usa ka tuig nga community service.
Matud pa dunay Klinefelter syndrome, usa ka chromosomal disorder si Medcalf. Ang maong sakit mao ang padayon nga pagdako sa usa ka tawo apan bata gihapon ang panghunahuna.
Sigun sa taho sa metro.co.uk, lakip sa mga salaod nga nahimo ni Medcalf mao ang pagpusil niya sa usa ka babaye gikan sa ilang bintana gamit ang usa ka BB gun, pagpangawat og mga regalo ug ingon man kwarta. Sa dihang nadakpan, nakuha sa iyang posesyon ang kinawat nga mga pagkaon apil na ang usa ka steak gikan sa usa ka pub.
Si Medcalf nakasilbe lang og 75 ka adlaw sa prisohan diin ang iyang katre ug mga uniporme pwerteng gamaya alang kaniya. (BANAT NEWS)
- Latest
