Lungkab sa meat shop inside job?
CEBU, Philippines – Inside job ang usa sa gitutukan sa kapolisan nga anggulo sa pagkahanaw sa dul-an P200 mil sulod sa vault sa meat shop sa Cabancalan Street, barangay Talamban, dakbayan sa Sugbo sa nakalabay nga buntag.
Ang usa sa mga trabahante nga si Jemson Tener ang una’ng nakamatikod nga duha sa lima ka kandado sa pultahan ang wala na-locked atol sa ilang pag-abli sa meat shop sayo sa buntag.
Dali dayun nipahibawo sa ilang manager ug sa pagsubay nila sa vault nahanaw na ang P194, 657.00.
Matud ni PO1 Gringo Muldez, desk officer sa Talamban Police Station, nga nisamot ang ilang pagduda nga inside job ang maong hitabo kay naabli ang vault nga may kombinasyon sa mga numero ang lock gawas sa lima ka kandado.
May close circuit television (CCTV) camera ang meat shop apan giputol ang wire ug gikuha ang memory card.
“Suhito kaayo ang kawatan, wala’y force entry sa crime scene,” matud ni Muldez.
Sigun ni Muldez nga plano sa manager nga ipaubos sa lie detector test ang tanan trabahante sa The Pork Shop. – /GMR) (BANAT NEWS)
- Latest
