Kun palagputon si P. Noy kinsay mopuli?
CEBU, Philippines – Way igong rason aron palagputon si Presidente Benigno Aquino III gikan sa pwesto gumikan lang sa nahitabo sa pagkamatay sa 44 ka sakop sa Special Action Force (SAF).
Si Gobernador Hilario Davide III nagkanayon nga walay igong basehan ang maong panawagan aron lang magtukod og ‘caretaker government.’
Ang National Transformation Council (NTC) nanawagan sa pagpakanaog dili lang sa presidente kun dili sa tibuok gobiyerno ug mogama og “caretaker government.”
Ang gobernador nagkanayon nga kung mogama og “caretaker government” dunay mahitabong constitutional crisis, ug wa kini rason tungod kay functional man ang gobiyerno.
Gikwestiyon hinuon ni Davide kung kinsa ang gustong molingkod sa caretaker government.
Dugang sa gobernador nga sa iyang nahibaw-an dunay usa ka tawo nga gikan sa kanhi administrasyon ug mga kritiko sa presidente ang miapil sa maong lakang ug posibleng ang maong mga tawo duna kini personal nga tumong.
Samtang di usab motuo si Davide nga dunay coup d’etat nga mahitabo tungod kay ang armadong kusog sa nasud ug kapolisan mga propesyonal ug mopatigbabaw kanila ang pagtuman sa balaod. Matud ni Davide nga ang pagpahigayon og kudeta dili maayo sa nasud. – /EIM) (BANAT NEWS)
- Latest
