P300T gitulis sa Balamban

CEBU, Philippines – Mga bag-ong tubo ug mga batan-on nga tulisan nga armado ang gisubay karon sa kapolisan sa Balamban human nabiktima ang magtiayun nga negosyante nga nakuhaan og kapin P300,000 sa merkado publiko sa barangay Sta. Cruz alas 8:45 sa nakalabay nga gabii.

Ang nabiktima naila nga sila si Emelito ug Jasmin Francis, adunay sari-sari store sa maong merkado ug nagpuyo sa maong lungsod.

Matud ni SPO2 Ranielito Villarino, chief investigator sa Balamban Police, nga paingon na unta nga mouli sa ilang balay ang mga biktima gikan sa merkado dihang kalit lang niatake ang mga tulisan.

Sa wala pa nakahunat sa pagdagan ang motorsiklo sa magtiayun, kalit lang gibunlot sa usa ka tulisan ang dala nga sling bag ni Jasmin hangtud nga natumba ang motorsiklo ug nakuha sa mga tulisan ang sling bag.

Sumala pa ni Villarino nga nakita ni Emelito nga dunay dala nga pistola ang duha ka tulisan ug ang duha nila ka kauban ang nagsakay na’ng daan sa duha ka motorsiklo nga maoy gisakyan sa ilang pagsibat.

Sa inisyal nga pagsubay sa kapolisan gitug-an ni Villarino nga usa ka grupo sa mga batan-on ang nibiktima sa magtiayun nga gilangkuban sa mga batan-on sa Balamban ug ang uban gikan sa silingan nga mga lungsod.

Ang maong grupo gikonsiderar sab sa kapolisan nga armado ug delikado nga mosukol sa mga polis.

“Ato na sila’ng gikonsiderar nga ‘armed and dangerous.’ Mga early 20’s pa ni sila sir pero lisud kaayo kung dili ni sila mabadlong, mga hot pa kaayo ni, mopusil gyud ni’ng mga bataa,” matud ni Villarino.

Gisubay karon sa kapolisan kung asa magtago ang mao’ng mga batan-on ug kung wala ba kini’y gisandigan nga ubang grupo. – /GMR) (BANAT NEWS)