“Chairman Mao” ika-31 nga biktima ubos sa PNoy administrasyon–NUJP

CEBU, Philippines – Lokal nga brodkaster sa Bohol nga gipatay niadtong Valentine’s Day maoy ika-31 nga tigbalita nga gipatay sukad nga milingkod si Presidente Benigno Aquino III.

Si Maurito Lim, kinsa usa ka blocktime broadcaster sa dyRD AM Station sa Tagbilaran City namatay tungod sa usa ka samad pinusilan sa iyang wala nga dunggan nga milapos sa pikas dunggan samtang padung na kining mokanaog sa iyang sakyanan sa parkingan sa sibyaanan.

Si Lim usab maoy ikaduhang tigbalita nga gipatay diha sa Tagbilaran ug ika- 172 sukad sa 1986.

Ang Malacañang pinaagi ni Presidential Communications Operations Office Secretary Herminio Coloma Jr. sa interbyu kaniya sa Radyo ng Bayan sa gobiyerno miingon nga dako og papel sa katilingban ang mga sakop sa media. Kini maoy hinungdan kun nganong gihimug-atan sa gobiyerno ang kasigurohan sa kaluwasan ug pagpatigbabaw sa kagawasan sa prensa. "Kinikilala ng pamahalaan ang mahalagang papel ng mga mamamahayag sa ating lipunan, kung kaya patuloy itong nakikipagtulungan sa hanay ng mga peryodista at manggagawa sa sektor ng pangmadlang komunikasyon upang mapangalagaan ang kaligtasan at maitaguyod ang kalayaan ng pamamahayag," sumala pa ni Coloma. Si Lim padung na unta magsibya sa iyang programang “Chairman Mao on Board” nianang orasa dihang kalit kining gipusil sa nag-inusarang lalaki makausa ka higayon. Gisusi karon sa kapolisan kun dunay nakuhang footage ang closed-circuit television camera sa maong sibyaanan nga makatabang sa imbestigasyon ug pag-ila sa mamumuno sa biktima.

Ang National Union of Journalists of the Philippines (NUJP) mihagit sa gobiyerno nga dakpon ug lutoson ang mga killer ni Lim.

"While we seriously doubt demanding justice will get us, or Maurito Lim’s family and colleagues, anywhere, we challenge the government to prove us wrong by acting swiftly to solve the case, arrest the killers and, most important, the mastermind who ordered his death," sumala pa sa statement sa NUJP. Sumala pa sa artikulo sa NUJP nga ilang kinutlo gikan sa NUJP Tagbilaran chapter vice chairman nga si Leo Udtohan, dunay mga opisyal nga nalambigit sa illegal drugs sa Bohol nga gikomentaryohan ni Lim. (BANAT NEWS)