PB mag-sesyon sa Bogo karon
CEBU, Philippines – Ipahigayun karong adlawa sa Sangguniang Panlalawigan (SP) sa Sugbo ang out-of-town session sa New City Hall sa siyudad sa Bogo.
Kini ang labing una’ng out-of-town session sa SP ubos sa administrasyon ni Gobernador Hilario Davide III.
Ang katapusang out-of-town session nga napahigayun kaniadto pa sa panahon ni kanhi gobernador, karon Kongresista Gwendolyn Garcia sa lungsod sa Boljoon.
Matud ni SP Secretary, Atty. Pulchra Marie Acevedo, nga ang maong out-of-town session sa Bogo City usa ka paagi nga magkaduol ang mga opisyales sa probinsya sa Sugbo ngadto sa ilang katawhan.
Sigun sa house rules sa SP nga aduna gyu’y bisan usa nga district session matag kwarter.
Usa sa agenda sa maong session ang giduso nga resolusyon nga maghatag og awtoridad ni Davide nga molagda, sa ngalan sa pangagamhanan sa lalawigan, og kontrata sa 13 ka consultants ubos sa buhatan ni Bise Gob. Agnes Magpale.
Lain nga hisgutan ang ordinansahon nga Provincial Adolescent Health and Youth Development Program nga gimugna ni Board Member Miguel Antonio Magpale.
Sa dili pa ang session, adunay consultative assembly kauban si Davide aron sa pagpaminaw sa mga nagkadaiyang problema sa mga lokal nga opisyales ug residente. – /GMR) (BANAT NEWS)
- Latest
