Gatosan ka youth sa LLC nag-flash mob
CEBU, Philippines - Gatusan ka batan-on nga nagsul-ob og puwa ang nisalmot sa usa ka flash mob nga sayaw sa mga pangpublikong lugar sa dakbayan sa Lapu-Lapu isip pagsaulog sa Valentine’s Day kagahapon.
Si Nicole Frances Balao, in-charge sa eco-based tourism and youth-related activities sa City Tourism Office, nagkanayun nga kini ang una’ng flash mob sa kabatan-onan diin kalit sila mosayaw atubangan sa daghan nga mga tawo.
Sagad sa mga batan-on nga nanayaw nagpangedaron og 13 hangtud 18-anyos.
Sulod sa unom ka minuto ang flash mob, upat ka sikat nga kanta ang gipatukar lakip sa “Free Yourself” nga theme song sa dakbayan.
Una’ng nipresentar ang mga dancers sa arrival hall sa Mactan-Cebu International Airport alas 12 sa udto aron paglingaw sa mga turista.
Kini gisundan sa Gaisano Island Mall ug sa merkado sa barangay Poblacion nga nakapakurat sa mga kustomer lakip sa mga sales ladies, dispatchers, kargador sa merkado ug uban pa.
Laing mga lugar nga giadto sa grupo ang parke ubos sa Marcelo Fernan Bridge, Poblacion Plaza ug Mactan Shrine ug nahuman alas 8 sa gabii.
Si Balao niingon nga nakig-coordinate sila sa mga establesemento ug tourist police alang sa seguridad.
Giangkon ni Balao nga aduna sila’y accomplice nga mga sakop sa security guard sa mall alang sa ilang gihimo nga eksena o “drama” sa panagway sa manag-uyab. Ang kalihukan kabahin sa branding sa siyudad isip Historic Resort City. (BANAT NEWS)
- Latest
