3 ka ‘pushers’ nadakpan

CEBU, Philippines - Tulo ka mga lalaki ang nadakpan sa managlahing anti-illegal drugs operation sa dakbayan sa Mandaue ug Liloan.

Ang mga sakop sa City Intelligence Branch (CIB)  misikop kang Getson Baclohan Alilin, 20, diha sa Sitio Calubihan, Barangay  Umapad. Ang grupo nga nakadakop kang Alilin gipangulohan ni Senior Inspector Hugo Rio Ipong  human kini napalitan og balor P300 nga kantidad sa shabu. Dugang nakuha kaniya ang duha ka paketeng shabu ug usa ka kalibre .22 nga armas ug mga bala niini.

Samtang nadakpan sa kapolisan diha sa Sitio Tiwasan, Barangay Catarman, Liloan sila si Wilvic Montecillo, 39, ug Tevens Cacanog, alyas Teban, 33, pulos nagpuyo sa maong dapit.

Ang grupo ni Senior Inspector Ramil Morpos milusad og  buy-bust operation batok sa duha nga miresulta sa ilang pagkasikop ug pagkasakmit sa lima ka paketeng shabu.

Ang pagkasikop sa duha natigayon tungod sa impormasyon gikan mismo sa ilang mga silingan. (Romeo T. Limpangog/EIM)(BANAT NEWS)