Italian tourist gipangita sa DOH
CEBU, Philippines - Gipangita karon dinhi sa Visayas ang usa ka turistang Italian nga nakasakay sa laing Filipina nurse nga nagpositibo sa Middle East Respiratory Syndrome Coronavirus (MERS-Cov).
Ang maong mga pasahero kabahin sa 224 ka tawong luwan sa Saudia Flight SV860 gikan sa Riyadh nga niabot dinhi sa nasud niadtong Pebrero 2.
Silang tanan padayong gipangita sa Department of Health Region 7 aron ma-medical checkup.
Samtang ang nurse nga unang nakit-ang nagpositibo padayong giatiman sa Research Institute for Tropical Medicine (RITM), apan napulo ka mga tawong unang miatiman kaniya sa unang tambalanan nga gidad-an kaniya apil ang iyang bana nagpakita karon og sintomas sa maong sakit. Apil sila karon sa gidala sa RITM.
Matud ni Dr. Dino Caing, medical coordinator sa Emerging and Re-Emerging Disease sa DOH-7, ilaha nang nakit-an ang 29-anyos nga babayeng nurse nga nagpuyo dinhi sa Sugbo apan wala pa nila makit-i ang 59-anyos nga turista gikan sa Italy.
Ang babayeng nurse gipaubos na sa medical checkup diha sa Vicente Sotto Memorial Medical Center ug nagnegatibo kini sa MERS-CoV.
Naglisod ang DOH pagpangita sa Italian tourist tungod kay di ma-contact ang numero sa telepono sa health checklist.
Nag-alayon karon ang DOH ug Bureau of Quarantine ug Bureau of Immigration alang sa pagpangita sa maong langyaw.
Gihupay usab sa DOH-7 nga MERS-CoV free pa gihapon ang Kabisay-an.(Decemay P. Padilla/EIM)(BANAT NEWS)
- Latest
