Gidili ang eskandalo sa Feb. 14

CEBU, Philippines - Magpakatap og mga polis ang Cebu City Police Office (CCPO) sa mga lugar nga dagsaon karong Valentine’s Day.

Ang hepe sa Police Community Relations (PCR) sa CCPO, Chief Inspector Enrique Belciña nga nahinabi sa Banat News miingon nga dili nila buot nga maguba ang adlaw sa mga managhigugmaay tungod sa mga tawo unya nga mopahimulos sa kahigayonan.

Nagpahimangno ‘sab si Belciña ngadto sa mga managhigugma nga dili g’yud magpalabi og pakita sa ilang nag uros-uros nga gugma nga makaeskandalo na sa uban.

Matud ni Belciña nga mahimo silang makasohan og  alarm and public scandal diin sila pwede’ng mapriso.

“Aron dili sila gusto mapriso sa adlaw sa gugma, likayan na lang nila kana’ng mga buhat nga eskandaloso sa publiko,” matud pa ni Belciña.Ang mga polis ibutang sa mga public plazas, mga kan-anan ug bisan asa nga suroyanan sa dakbayan. Giawhag usab nila ang katawhan nga dili na magdala og mga mahalong gadgets, alahas, daghan nga kwarta kung manglaag aron dili matintal ang mga mangunguot o tulisan. (BANAT NEWS)