‘Kawatan’ sa sud sa CCSC nadakpan
CEBU, Philippines - Nasikop sa kapulisan sa Fuente Police ang usa ka 24- anyos nga lalaki human kini nakuhaan og footage sa closed-circuit television camera nga nangawat og mga gamit sa mga nag-jogging sulod sa Cebu City Sports Center.
Ang suspetsado naila nga si Mark Joseph Fernandez, kanhi dance instructor ug taga San Roque, Mambaling ning dakbayan sa Sugbo.
Samtang ang biktima naila nga si Ralyn Villarente, 29, nagpuyo sa Barangay Tisa ug nag- jogging sa CCSC niadtong orasa.
Matud pa ni Chief Inspector Wildemar Tiu ang hepe sa Fuente Police gikuha sa suspek ang bag ni Villarente dayon misibat, pagkasayod sa biktima nga nawala iyang bag dali kini nga mitug-an sa tagdumala sa CCSC.
Unang gisubay sa biktima ang kuha sa close circuit television (CCTV) sa sports center ug ilang nakita nga gikuha sa suspek ang iyang bag.
Paglabay sa 30-minutos nahigalam ang suspek kay mibalik kini sa CCSC hinungdan sa pagkasikop kaniya.
Nagtuo si Tiu nga mibalik kini aron mangawat pag-usab tungod kay mga sinina ug P600 lang ang sud sa bag.
Nasubay usab sa CCTV nga si Fernandez ang responsable sa pagpangawat niadtong Enero 3 niini’ng tuiga. (BANAT NEWS)
- Latest
