Mga masakiton gimisahan ni Palma

CEBU, Philippines - Gisaulog sa Simbahan ang World Day of the Sick pinaagi sa usa ka Santos nga Misa diha sa Cebu Metropolitan Cathedral nga giselebrar ni Cebu Archbishop Jose Palma.

Dungan sa maong kasaulogan ang kapistahan sa Birhen sa Lourdes  nga gitambongan sa gatusan ka mga may mga kakulian sa panglawas. Sa wali ni Palma, kini miingon nga gawas sa pisikal nga kaayohan, kinahanglang dili kalimtan nga mangompisal alang sa kaayohan sa kalag ug sa moral sa usa ka tawo.

Nakadayeg usab  siya sa mga tawo nga padayong niatiman sa mga masakiton tungod kay makadasig kini kanila tungod kay dunay miunong sa ilang kahimtang ug wala sila pasagdai. Ang santos nga misa sa Cebu Metropolitan Cathedral gitapos pinaagi sa paglibot ni Palma sa Blessed Sacrament. (BANAT NEWS)