Nasudla’g espiritu

CEBU, Philippines - Pito ka mga tinun-an ang gikatahong nasudlan og espiritu diha sa Bartolome and Manuela Pañares Memorial National High School sa Barangay Poblacion lungsod sa Barili kagahapon sa hapon.

Ang kapolisan daling miresponde human sila makadawat og tawag sa usa ka concerned citizen nga nagpahibalo bahin sa maong hitabo.

Gikataho nga dunay gipahigayong pag-ampo sa rosaryo ang mga bata nga diin sila ra usab maoy nagsilbing mananabtan.

Tungatunga sa ilang pag-ampo gikatahong nasudlan og espiritu ang mga bata ilabi na kadtong mananabtan.

Gidala ang maong mga bata sa kombento sa parokya sa Barili   aron mabendisyonan sa pari ug ang uban gidala sab sa district hospital.

Sumala pa ni Police officer 3 Cristina Recaña, desk officer sa Barili Police Station miadto sila sa dapit aron kontrolahon ang mga tawo nga dali kaayong midugok sa eskuylahan ug sa Barili District Hospital.

Hinuon way na-report nga nasakitan sa maong hitabo bisan pa man sa giingong kakusgan sa mga batang nasudlan og espirito nga gitabangan og pugong sa mga tawo.

Ang ubang mga estudyante miuli sa ilang mga balay apan ang uban  nagpabilin sa sulod sa eskuylahan aron sa pagrosaryo.

Miresponde usab sa alarma ang mga sakop sa Municipal Disaster Coordinating Council ug ang mga traffic enforcers sa maong lungsod. (BANAT NEWS)