SK election sunod tuig na
CEBU, Philippines – Masaligon si provincial election supervisor Lionel Marco Castillano nga mauswag na gyud ang eleksiyon sa Sangguniang Kabataan sunod tuig dungan sa barangay.
Kini human naduso na ngadto sa presidente ang balaudnon nga gipasar sa Kongreso ug nagpaabot na lang sa pirma.
Matud ni Castillano nga kung ang balaudnon dili mapirmahan sulod sa 30 ka adlaw mahimo na kini’ng balaud sa pag-uswag sa SK election sunod tuig.
“The President will sign it or not, it is now definite that the SK election is postponed,” matud ni Castillano.
Gikatakda unta ang eleksiyon sa SK karong Pebrero 21.
Gipasabot ni Castillano nga tumong sa pag-uswag sa eleksiyon aron ang SK mareporma ug mahatagan og panahon ang Kongreso nga makapalabang og reform law. – /GMR) (BANAT NEWS)
- Latest
