Libre’ng raffle sa taga Opon

CEBU, Philippines – Liboan ka residente ang nisalmot sa kalihukan sa dakbayan sa Lapu-Lapu nga Love Out Loud, usa ka libre nga raffle draw nga gilusad sugod sa niaging Pebrero 5 hangtud 10.

Gidayeg sa pangulo sa Association of Barangay Captains, Jose Dungog, ang proyekto nga gipangulohan ni Nicole Frances Balao sa City Tourism Office aron mahatagan og higayun ang mga residente nga makauban ang ilang mga gihigugma atol sa adlaw sa gugma. Dili lang mga minyo kun dili lakip sa mga singles ang apil sa proyekto. Usa ka dropbox ang giapod-apod sa 30 ka barangay og 13,000 ka libre nga raffle tickets ang gipanghatag sa mga residente.

Matud ni Balao nga kapin sa 20 ka gift certificates gikan sa mga resort, hotels ug restaurants nga mohatag og fancy dinner ang sagad nga premyo sa mga makadaug samtang ang mabunutan sa grand prize mahimong makadaug og overnight stay for two sa Shangri-la Mactan Resort and Spa ug Plantation Bay Resort & Spa.

Gawas sa mga langyaw nga mobisita sa dakbayan tungod sa turismo, tumong ni Balao sa pagpahigayun sa kalihukan nga makahatag og higayun sa mga lumad nga residente nga makasuway sa mga resort ug restaurants. Si Balao nagkanayon nga ang pag-anunsiyo kung kinsa ang makadaug sa raffle draw ipahigayun sa press conference ni Mayor Paz Radaza karong adlawa. – /GMR) (BANAT NEWS)