Hot cake vendor nagselos, dispatser gidunggab

CEBU, Philippines – Gidunggab sa hot cake vendor ang usa ka dispatser sa barangay Poblacion, dakbayan sa Lapu-Lapu alas 8:45 sa buntag sa niaging Domingo.

Matud ni PO2 Jerson Alparito sa Lapu-Lapu City Police Office- Homicide Section nga nagsugod ang insidente sa selos ug kalagot tali sa biktima nga si Jose Flores, 41, dispatcher, taga barangay Gun-ob ug sa suspek nga si  Ronald Derota, 32, hotcake vendor nga taga sitio Langub, barangay Poblacion.

Pulos may kapuyo si Flores ug Derota. Nangita og kaparkingan sa iyang motor si Flores sa Rizal Plaza sa barangay Poblacion niadtong buntaga. Si Derota kalit mitunga sa iyang likod ug sa wala’y pagduha-duha, nidunggab ang suspek gamit sa usa ka hait nga hinagiban nga igo sa likod nga bahin sa lawas sa biktima. Nidagan palayo ang suspek samtang gidala sa Emergency Rescue Unit Foundation ang biktima sa tambalanan.

Laing motibo nga gitan-aw sa kapolisan ang selos ni Derota sa biktima tungod kay suod nga managhigala ang iyang kapuyo ni Flores ug gituohan nga may tinaguan sila nga relasyon. – /GMR) (BANAT NEWS)