Liog hapit naputol

CEBU, Philippines – Halos maputol na ang liog sa usa ka lalaki kinsa gitigbas ug gipatay sa iya ra sab gika-inom sa sitio Ubayon, barangay Garing, lungsod sa Carmen pasado alas 5 sa nakalabay nga kadlawon. Ang biktima naila nga si Jenzen Heyrosa, 23, ulitawo, factory worker ug nagpuyo sa barangay Cantipay samtang gitudlo’ng suspek si Ronnie Incedencia, 29, ulitawo , mag-uuma ug silingan sa biktima.

Matud ni PO1 Chistito Aresco, desk officer sa Carmen Police, nga ang suspek ang gitumbok sa mga testigos sanglit mao’y katapusang kauban sa biktima sa wala pa nahitabo ang krimen ug nabilin sab sa crime scene ang kawo ni Incedencia.

Nagbuntagay ang inom sa biktima ug suspek kauban sa usa ka Michael apan dihang nangahubog na nitumaw ang panaglalis.

Pasado alas 4 sa kadlawon dihang nanggawas sa videokehan ang duha ug pipila ka minutos ang nilabay nakita na lang sa mga residente sa lugar nga naligo na sa iyang kaugalingong dugo si Heyrosa ug halos maputol ang liog ug wala na’y kinabuhi nga nagbuy-od daplin sa karsada.

Sumala pa sa mga molupyo nga sa wala pa nila nakita ang patay’ng lawas sa biktima ila nadungog nga daw sa may gitadtad sa daplin sa karsada.

Gawas sa daku’ng samad sa liog sa biktima, duna sa’y samad sa kamot ug bukton timailhan nga posible’ng nisuway pa og sukol ug sagang ang namatay apan wala’y nadungog nga singgit sa pakitabang ang mga tawo sa lugar. Nagduda si Aresco nga posible’ng gitabangan ang biktima sa pagpatay ug dili lang usa ka tawo ang naghimo sa krimen.

Wala pa’y kasayuran ang kapolisan kung unsa ang hinungdan sa panaglalis sa duha apan ang kapolisan duda nga kini gumikan lang sa ilang ka hubog.

Sa pagsubay sa kapolisan sa crime scene, wala’y nakita nga hinagiban apan matud pa posible’ng sundang ang gigamit gumikan sa kalawom sa samad nga naangkon sa biktima. – /GMR) (BANAT NEWS)