Mangilkil nga enforcer ipareklamo
CEBU, Philippines - Giawhag sa Traffic Enforcement Agency of Mandaue (TEAM) ang mga drayber nga nabiktima sa pagpangilkil sa ilang mga traffic enforcers sa pagpasaka og pormal nga reklamo. Matud ni Edwin Ermac, operations chief sa TEAM, nga ang pormal nga reklamo ang ilang basehan sa imbestigasyon ug kun mapamatud-an, dili sila magduha-duha sa pagpahamtang og silot.
Hatagan usab og kaangayan ang gipasanginlan nga nangilkil sa pagpadayag sa ilang habig.
Si Ermac niingon nga adunay mga reklamo sa pagpangilkil nga iyang nadunggan gikan sa mga drayber apan wala’y pormal nga reklamo nga gipadangat sa iyang buhatan.
Giluwatan ni Ermac ang maong awhag human nahimo’ng viral sa social media video sa duha ka traffic enforcers nga sila si Armand Gallardo ug Ringgo Pinados nga giingo’ng nangilkil sa usa ka langyaw. Si Ermac niingon nga ang wala pag-isyu og citation ticket ngadto sa langyaw ang nakapatumaw sa katahap hinungdan nga girelibohan ang duha ka enforcers.
Ang mga sakop sa Pinagkaisang Samahan ng mga Tsuper Nationwide (PISTON) lakip sa nipasangil diha’ng naghimo sila og protesta atubangan sa Mandaue City Hall.
Gani ilang pasangil nga ang pipila ka traffic enforcers modawat lang og P20 sa mga drayber nga ilang madakpan. (BANAT NEWS)
- Latest
