Sugbuanong SAF ilubong karon

CEBU, Philippines - Ilubong na karong adlawa ang duha ka PNP-Special Action Force commandos nga namatay sa engkwentro sa Maguindanao apan mga kanhi SAF nga nia na sa Sugbo nasubo gihapon kaayo sa ilang kamatayon.

Sumala pa ni Senior Police Officer 1 Renante Solante, Provincial Intelligence Branch operative, nasubo siya og maayo sa gidangatan sa mga SAF sa Maguindanao.

Si Solante usa ka kanhi miyembro sa SAF ug nasuhito siya sa kaagi sa mga   pagsugod pa lang nila pagbansay-bansay aron masulod sa maong elite force sa PNP.

Matud pa niya, dako kaayo ang kalainan sa agian sa aplikante kun buot silang makasulod sa SAF , mas labaw na kun hisgutan na ang pamaagi sa training.

Numero unong kinahanglanon mao ang determinasyon nga mahimong SAF commando, kun dunay pagduhaduha, usa pa lang ka adlaw mopauli na ang aplikante.

Ang training moabot og usa ka tuig ug kinahanglan nga mokuha sila og foundation course.

Ang usa ka SAF kinahanglang moserbisyo sa maong unit sud sa lima ka tuig una pa sila tugotan nga makabalhin og laing police unit sama sa pagpadestino sa ilang lungsod.

Lakip sa pagbansay-bansay nga madawat sa SAF mao ang Commando Course, nga naglakip sa Close Quarter Battle; Urban Counter-Revolutionary Warfare Course o “Sureshock;” Sniper Course;  ug Basic Airborne Course, K9 Training ug Maritime Tactical Training Course.

Matud pa ni Solante nga bisan og dili niya mga ka-batch sa SAF ang maong mga namatay apan giisip niyang susama siyang namatyan og mga manghod.

Sa paglubong sa mga sakop sa SAF karong adlawa nanghinaot si Solante nga maangkon nila ang hustisya.

Kagahapon sa buntag, giduaw ni Interior Secretary Mar Roxas ang haya nila ni PO1 Romeo Cempron sa Consolacion ug PO1 Wendel Candano diha sa Saint Peters Funeral Chapels aron pagpaabot sa pahasubo ngadto sa pamilya sa maong polis.

Sumala pa nga mitunol si Roxas og tag P20 mil nga hinabang; gitunol usab ni Gov. Hilario Davide III ang P50 mil gikan sa Kapitolyo; samtang si Sr. Supt. Conrad Capa mihatud usab sa P40 mil nga hinabang gikan sa amotay sa mga sakop sa Cebu City Police Office ug pribadong mga tawo.

Diha usab sila si Chief Supt. Carmelo Valmoria, ang hepe kaniadto sa CPPO ug karon mao nay pangulo sa National Capital Region Police Office (NCRPO) ug si Police Regional Office-7 Director Prudencio Tom Bañas. Ang biyuda ni Cempron nga si Christine nagpasalamat sa suportang ilang nadawat apan nasayod siya nga di na mabalik pa ang iyang bana.

“I appreciate the sympathy and support and everything because it helps us a lot, but it just make us realized that no amount of money can really replace our husbands,” matud pang Christine.  (BANAT NEWS)