DFA padayong misusi sa krisis sa Libya
CEBU, Philippines - Padayon pang giberipika sa Department of Foreign Affairs ang report nga dunay duha ka mga Filipino nga naapil sa mga napatay sa pag-atake sa mga Islamic militants sa usa ka oilfield sa Libya.
Sa report sa GMA News Online, ang tigpamaba sa DFA nga si Charles Jose miingon nga wala pa nila ma-beripika ang maong impormasyon.
Sa sayo pa, si Foreign Affairs Secretary Albert del Rosario mibutyag nga dunay tulo ka mga Filipino nga naapil sa mga gisignit sa mga armadong lalaki gikan sa Mabruk Oil Field. Sa laing report, usa ka Libyan official ang miingon nga duha ka Filipino, walo ka Libyans ug duha ka Ghanians ang namatay apan walay gisignit sa mga militante.
Ang mga biktima gipusil ug duna say gipunggotan og liog. Way mga sakop sa media nga nakaadto sa lugar tungod sa kahilit ug gilay-on niini nga nahimutang tunga-tunga sa disyerto.
Ang Pilipinas adunay kwatro mil ka mga OFWs sa maong nasud bisan pa man sa mando sa gobiyerno nga papaulion sila tungod sa kapeligro sa sitwasyon sa maong nasud. (BANAT NEWS)
- Latest
