Di interesado mokostudiya

CEBU, Philippines - Giklaro sa abogado sa 16-anyos nga gi-turnover na sa probinsya ngadto sa Sogod, Leyte, nga dili sila interesadong mokustodiya niini.

Kini maoy reaksyon ni Atty. Rene Abcede Jr. human siya gikwestyon ni Bise Gob. Agnes Magpale kun si kinsa may nikuha sa iyang serbisyo aron mahimong manlalaban sa maong menor de edad.

Si Magpale miinsister nga subay sa balaod, ang menor de edad nga nakalapas sa balaod nga gikostudiya sa social welfare kun walay ginikanan nga mokustodiya niini kinahanglang sa laing social welfare center g’yud kini ipasa.

Sa kaso sa maong menor de edad, wala nay mga kabanay niini ug mismo iyang ginikanan ang dili na buot modawat niini human sa daghang mga dautang gipanghimo dinhi sa Sugbo.

Apan si Abcede miingon nga buot sa maong menor de edad nga makagawas gikan sa kustodiya sa Department of Social Welfare and Development.

Ang menor de edad unang gikostudiya sa Provincial Council for the Welfare of Children ug gi-turnover ngadto sa laing sentro sa Sogod human nga mimando ang korte nga kini pabuhian human nakapiyansa ug dili na interesado nga mokiha ang mga reklamante.

Sa interview sa CCTN-47, si Abcede miingon nga dili nila igsapayan bisan kinsa ang mokustodiya sa bata apan ang importante nga ang DSWD mosunod sa mando sa korte nga hatagan kini og kagawasan ug naa sa menor de-edad ang pagdesisyon kun asa siya. Kini tungod kay sila mismo sa DSWD ang miingon nga ang maong dalagita nahibawo sa tanan niyang gihimo.

Dugang pa ni Abcede nga mismo ang dalagita di ganahan sa iyang sitwasyon ug misuway na pagkutlo sa iyang kinabuhi.

Karong Martes sunod semana adunay ipahigayon nga hearing kalabot sa ilang hangyo sa korte nga i-release na kini gikan sa kustodiya sa DSWD. (BANAT NEWS)