P100T danyos sunog sa lumber yard

CEBU, Philippines - Mokabat sa P100,000 ang gibanabana’ng danyos sa nasunog nga lumber yard sa  Ibabao-Estancia, dakbayan sa Mandaue alas 5:30 sa hapon niadtong Martes.

Ang Tokonome Enterprises nga gipanag-iya ni Walbert Pugoy ang nasunog gumikan sa cutting nga gihimo gamit ang welding machine sa atop nunot sa gikatakda’ng pagbalhin niini sa atbang nga luna.

Si barangay kapitan Carmelino Del Mar Jr. niingon nga ang ilang mga sakop sa Barangay Fire Brigade ang una’ng nakatubag sa alarma nga mao usab ang dali nga nakapahibawo sa Bureau of Fire Protection (BFP) sa maong dakbayan.

Si Senior Fire Officer 1 Cefriano Codilla, imbestigador sa BFP sa maong dakbayan, niingon nga giangkon sa mga trabahante nga nitugpa sa gikamada nga kahoy ang nalagpot nga kayo gikan sa welding machine hinungdan sa sunog.

Dugang niya nga ilang nakontrolar ang kayo sulod sa 10 minutos ug dali nila’ng gipaubos sa second alarm hinungdan sa pagtabang usab sa ubang kabomberohan nga naglakip sa Cebu City, Filipino Chinese Volunteer Fire Brigade ug uban pa.  Wala’y gikataho nga naangol o nakalas sa maong insidente. (BANAT NEWS)