DOH-7 makigtagbo sa pamilya’ng Coliflores

CEBU, Philippines – Temporaryo nga gisirad-an sa Department of Health-7 ang imbestigasyon kalabot sa usa ka pasyente kinsa giingo’ng biktima sa medical malpractice sa Mandaue City Hospital. Kini human gitug-an ni DOH-7 Director, Dr. Jaime Bernadas, nga wala sila’y nakita’ng kalapasan sa doctor, nurses ug tambalanan base sa data nga ilang nahipos.

Naglakip niini ang pag-negatibo sa gihimo’ng skin test sa antibiotic nga gihatag ngadto sa pasyente nga si Jocelyn Coliflores diin ang antibiotic gihatag lang isip paagi sa pagsanta sa posible’ng bacteria nga nakaingon sa iyang hilanat.

Gihangop sa pangulo sa Mandaue City Hospital, Dr. Ma. Lourdes Espinosa, ang nahimo’ng resulta sa imbestigasyon sa DOH-7.

Giangkon ni Berandas nga maglisud sila sa pagkuha sa diagnosis sa hinungdan sa kamatayon sa biktima kay dugay na kini’ng nalubong.

Awhag ni Bernadas sa pamilya nga maayo’ng ipaubos sa histopathology examination o microscopic ug forensic examination ang patay’ng lawas sa biktima pinaagi sa autopsy.

Matud niya nga gross examination lang ang gihimo nga autopsy sa Cebu City Crime Lab ngadto sa pasyente.

Gihangyo unta ni Bernadas nga pakigkitaan ang pamilyang Coliflores ilabi na ang bana sa pasyente nga si Cesar apan wala makatunga human usab aduna pa’y hearing nga gitambungan ang ilang abogado.

Bisan giundang na ang imbestigasyon, himuon gihapon ang pakigtagbo sa kadagkoan sa DOH-7 ngadto sa pamilya karong adlawa. – /GMR) (BANAT NEWS)