Lumba sa reclamation, polis ra’y lipaton

CEBU, Philippines – Gibati og kabalaka ang mga drayber sa pribado’ng sakyanan ug drayber sa taxi sa nagpadayun nga kinawat-kawat nga lumba sa sakyanan sa reclamation area, dakbayan sa Mandaue panahon sa gabii.

Si Timoteo Dulag, 43-anyos, minyo nga taga Guinsay, dakbayan sa Danao, taxi drayber, niingon nga ala una pasado sa kadlawon nga naghatod siya og pasahero paingon sa airport hapit gyud siya mapunggit sa naghagiyos nga duha ka motorsiklo nga iyang gituohang naglumba subay sa Ouano Avenue.

Ang pipila ka pump boy sa gasoline station sa maong dapit nikompirmar sa nagpadayun nga lumba sa motorskilo.

Si Police Officer 2 Rosendo Ortalla Jr. sa traffic division sa Mandaue City Police Office (MCPO) niingon nga nakadawat sila og mga taho labot sa nagpadayun nga lumba sa sakyanan sa maong dapit.

Ilang gihimo ang pagpatrolya sa maong dapit ug ilang nakita ang grupo sa mga motorista nga nagtapok apan wala’y lumba nga gihimo hinungdan nga dili sila makadakop. Si Ortalla niingon nga sa higayun nga mobiya na sila sa maong dapit, mao’y higayon ang ilang pagpahigayun og lumba.

“Kami lang maoy ilang bantayan, kun wala na mi sa maong lugar nga nagtan-aw nila mao sad ang ilang paglumba,” matud ni Ortalla.

Ang hepe sa traffic division sa MCPO nga si Chief Inspector Jesus Elmer Fernandez niingon nga nahunong na kaniadto ang maong lumba sa sakyanan dihang may naaksidente. Si Edwin Ermac, operation chief sa Traffic Enforcement Agency of Mandaue (TEAM), sa ilang bahin kun maoy modakop, P200 ra ang multa kay wala na man sila magdala og TOP. – /GMR) (BANAT NEWS)