UV scholarship sa anak sa sugbuanong SAF

CEBU, Philippines - Mohatag og full scholarship ang University of the Visayas sa mga anak sa duha ka sakop sa Special Action Force (SAF) nga taga Sugbo nga namatay sa ingkwentro sa Mamasapano, Maguindanao.

Kini ang gipadayag sa founder sa JRG Halad Foundation, Jose R. Gullas, nga nahinabi sa Banat News.

Matud ni Gullas nga iyang gibati ang labing kasubo sa pagkamatay sa 44 ka sakop sa SAF sa Maguindanao ug labaw sab siya nga nasubo nga duna’y tulo ka sakop sa SAF nga taga Sugbo.

Gusto ni Gullas nga matagaan og tabang ang pamilya sa mga polis pinaagi sa paghatag og full scholarship sa ilang mga anak gikan elementarya hangtud na sa paghuman sa kolehiyo.

Gawas sa kurso nga Medicine, Law, Marine ug Dentistry, pwedeng makakuha og bisan unsa nga kurso ang mga anak sa mga polis sa ilang tunghaan nga wala’y bayad. “Sugboanon gud na sila, affected gyud ko, you can imagine the feeling of the family unya tawon ang mga bata  wala na’y amahan, ilang livelihood will be affected, ang ilang future is very very dark, so if I can do something motabang ko ana,” matud ni Gullas.

Tanan anak sa mga taga Sugbo nga SAF nga namatay sa Maguindanao ang makadawat sa full scholarship nga gitanyag.

Gawas sa planong paghatag sa scholarship plano sab karon ni Gullas nga pakigkita-an ang pamilya sa namatay aron personal nga ma-estorya aron mapaabot ang pahasubo ug makahatag sa bisan unsa nga tabang lakip sa paghatag og pasidungog sa mga pamilya nga tawgon nga “Freemen of the Year”.

Si Gullas saludo sa mga sakop sa SAF ug nanawagan sa tanan nga mga Sugboanon nga motabang bisan gamay sa mga pamilya sa mga namatay nga police commando kay ang pagbuhis sa mga polis sa ilang kinabuhi bugti sab sa pagpatunhay sa kahapsay ug seguridad sa kadaghanan.

“They have given their lives to save us. I’m willing to see the family on what we can do.  I’m deeply touched with that, we should raise our hand and help the less fortunate,” dugang ni Gullas.

Samtang ang The Freeman Newspaper mohatag sab og financial assistance sa pamilya sa tulo ka Sugboanong sakop sa SAF. Si PO1 Windel Candano, taga Dumanjug, PO1 Romeo Cempron taga Consolacion ug si PO3 Junrel Kibete, lumad nga taga probinsiya sa Negros apan ang iyang kapuyo taga lungsod sa Argao. Sila nalakip sa 44 ka sakop sa SAF nga namatay sa ingkwentro sa Tukanalipao, Mamasapano, Maguindanao batok sa mga rebelding grupong Bangsamoro Islamic Freedom Fighters (BIFF) ug Moro Islamic Liberation Front (MILF). (BANAT NEWS)