Wa niatubang sa kaso, laing 3 nasikop
CEBU, Philippines - Gidakop sa kapolisan sa dakbayan sa Bogo ang usa ka akusado nga wala moatubang sa pipila na ka hearing sa iyang kaso.
Si PO1 Mayluna Lumungsod sa Bogo City Police Station niila sa nadakpan nga si Antonio Olaran Olimba, 35, taga barangay Banban.
Matud ni Lumungsod nga kaso’ng paghupot og ilegal nga armas ang giatubang ni Olimba ug napakyas sa pag-atubang sa pipila ka hearing.
Dugang ni Lumungsod nga karong Lunes ilang dad-on ang dinakpan sa korte.
Nasikop sa kapolisan sa maong dakbayan ang usa ka Jovic Itol, 34, taga barangay Guadalupe nga may warrant of arrest sa kaso’ng illegal nga sugal.
Nasikop sab si Nita Camay human kini nalutsi og bench warrant sa susama’ng kaso.
Samtang ang kapolisan sa lungsod sa Medellin nisikop sa usa ka Melanie Bulambao, 24, taga Lambusan, San Remigio sa niaging buntag pinasikad sa bench warrant.
Nag-atubang og kaso’ng oral defamation ang akusado ug nalakip sa “10 most wanted person” sa lungsod. (BANAT NEWS)
- Latest
