Restobar buot pasirad-an kay banha

CEBU, Philippines - Nadismaya ang mga residente nga nakapalibot sa Dynasty Bar sa Juana Osmeña St. sa siyudad sa Sugbo human naablihan og balik ang maong restobar.

Kahinumdoman nga temporaryong gipasirad-an ang Dynasty Bar niadtong Enero 10 human kini nakalapas sa Anti-Noise Pollution Ordinance kon City Ordinance No. 309. Matud sa reklamo sa mga residente nga gipangulohan ni Atty. Myrfi Gonzalez nga sila mi-apelar sa kagamhanan sa siyudad sa Sugbo nga temporaryong pasirad-an ang maong bar tungod sa naglanog-lanog nga kasaba nga nagagikan sa maong restobar. Gibutyag ni Gonzalez nga gikasubo sa mga residente ang pagbawi sa closure order sa Dynasty Bar human kini naka-renew sa ilang business permit.

Tungod niini, mipadangat na usab ang mga residente sa ilang complaint ngadto sa kagamhanan tungod kay nakadisturbo kini sa ilang pagpuyo gumikan sa kasaba nga madungog sa ilang puluy-anan.

Matud ni city administrator Lucelle Mercado, ang maong bar nakatuman sa ilang gisabotan nga tak-opan ang bar aron dili molanog ang tukar sa mga dagkong sound system niini. Gani, dugang niya nga gipasulod ang mga dagkong speakers sulod sa bar aron dili na makasamok sa mga residente. Apan human nakadungog si Mercado sa bag-ong complaint nga ipasaka batok sa Dynasty Bar, iya kining ipasusi og balik.  (BANAT NEWS)