Duha patay sa pagpanunggab

CEBU, Philippines - Patay ang duha ka tawo sa managlahi’ng insidente sa pagpanunggab sa dakbayan sa Sugbo.

Pasado alas 9 sa nakalabay nga gabii patay ang usa ka Lemuel Abaño, 32, kinsa gidunggab sa iyang manghud human nagkalalis sa sitio Missionares, barangay Suba.

Matud ni PO1 Reoful Adalim sa homicide section sa Cebu City Police Office nga gikasuko sa suspek nga si Ryan Abaño, 30, nga nahugawan ang iyang senina nga labhanan human giingong gibutangan sa maguwang sa kinan-an nga plato.

Tunga-tunga sa ilang lalis nagkasinukmagay ang duha ug nagka dinumogay apan wala kabantay ang maguwang nga nakakuha og kutsilyo ang manghud gikan sa kusina nga mao’y gigamit sa pagdunggab.

Igo sa tiyan ang naangkon ni Lemuel kinsa nakabsan gyud sa iyang kinabuhi samtang ang igsuon nitahan sa mga barangay tanod.

Samtang pasado alas 4 sa niaging buntag, patay ang usa ka 35-anyos nga lalaki kinsa gidunggab sa iyang silingan human nagkalalis sa sitio Groto, Upper Panabang, barangay Apas.

Ang biktima naila nga si Alvin Ricaña samtang ang suspek mao si Hermio Cordeniel, usa ka guwardiya ug pareho nga nagpuyo sa maong lugar.

Matud pa sa mga nakakita sa hitabo nga kalit lang naabot ang suspek sa balay sa biktima ug nagkalalis.

Nagkasukmagay ang duha apan kalit lang nikuha ang suspek sa iyang dala nga crowbar nga mao’y iyang gigamit og luba sa biktima.

Igo sa dughan, tiyan ug sa kilid sa iyang lawas ang naangkon ni Ricaña hinungdan nga nakabsan sa iyang kinabuhi samtang si Cordeniel nitahan sa barangay tanod sa barangay Busay. (Jojo C. Ugdol/GMR)(BANAT NEWS)