Dugang traffic lights, CCTV cams sa Mandaue itaud
CEBU, Philippines - Gitinguha sa kagamhanan sa dakbayan sa Mandaue ang gahin nga P39 milyones alang sa dugang mga traffic lights ug close circuit television (CCTV) camera nga ipangtaud sa mga dagkung eskina nga mga dalan sa dakbayan.
Si Christer Cosedo, pangulo sa City Management Information System Office niingon nga ilang gitinguha nga ang dugang traffic lights hingpit nga mapahimutang sa dili pa ang pagsugod sa kalihukan sa Asia-Pacific Economic Cooperation Summit sa Sugbo niining tuiga.
“Our target is to complete the installation before November,” matud ni Cosedo.
Niadtong 2013, ang kagamhanan sa dakbayan nakataud og siyam ka traffic lights ug CCTV camera sa siyam ka dagkung eskina sa gahin nga P40 milyones.
Matud pa ni Cosedo ang ikaduha’ng hugna nga pagpangtaud og mga traffic lights ug CCTV camera gitumong sa 12 ka dagku pa nga mga eskina sa dakbayan.
Kini naglakip sa dalan Plaridel ug eskina U.N. Avenue ug ang eskina sa Subangdaku flyover ug Maguikay flyover.
Ang Manila-based Triune Electronic Systems, Inc. ang gikontrata sa pagtaud sa mga traffic lights. (Romeo T. Limpangog/GMR)(BANAT NEWS)
- Latest
