Rama nimando na sa re-bidding sa CCMC

CEBU, Philippines - Nimando si Mayor Michael Rama nga sugdan na ang re-bidding  sa Cebu City Medical Center human kini napakyas sa niaging tuig gumikan sa gikataho’ng anomaliya.

Imbis P300 milyones, ang siyudad mo bid-out og dugang P300 milyones gikan sa pundo karong tuiga ug mga hinabang gikan sa laing nasud ug mga pribadong sektor.

Matud ni Rama nga iya nang gitahasan sila si CCMC Director, Dra. Gloria Duterte, ug CCMC administrative services head, Atty. Chris Panugaling, sa pag-andam sa mga dokumento.

Ang kuwarta maoy gamiton aron sugdan ang pagpabarug sa phase 1 sa tambalanan sa karaang nahimutangan niini.  Kahinumduman nga gi-disqualify ang WTG Construction and Development Corp. ug E.M. Ureta isip lowest bidders sa kantidad nga P274,975,904 gumikan sa giingong “discrepancies and false information” sa ilang dokumento.

Gitan-aw ni Rama ang dunay “competitive bidding process” pinaagi sa paglakip sa proseso sama sa advertisement, pre-bid conference, eligibility screening of prospective bidders, receipt and opening of bids, evaluation of bids, post-qualification ug award of contract.

Si Rama nitataw usab nga wala siya’y plano nga tangtangon ang CCMC ad hoc committee apan tun-an lang ang komposisyon niini. (Kristine B. Quintas/GMR)(BANAT NEWS)