Hustisya ug pagpadayon sa BBL gipanawagan
CEBU, Philippines - Si Gobernador Hilario Davide III sa probinsiya sa Sugbo nanawagan og hustisya alang sa 44 ka sakop sa Special Action Force (SAF) sa Philippine National Police (PNP) nga namatay sa nahitabong engkwentro tali sa grupo ug sa Moro Islamic Liberation Front (MILF) ug Bangsamoro Islamic Freedom Fighters (BIFF) sa Maguindanao.
Kagahapong adlawa gideklarar ni Presidente Benigno Aquino III ang “national day of mourning” pahinungod sa nakalas nga mga polis nga diin gihatagan sila og military honors sa mga kaubanan.
Matud ni Davide nakasabot siya sa gibati sa kapolisan apan nanghinaot siya nga dili unta kini makababag sa peace process sa Mindanao.
Ang gobernador gikatakdang mosugat ini og dad-on na nganhi sa Sugbo ang patay’ng lawas sa duha ka Sugboanong sakop sa PNP-SAF nga nakalas.
Sa iyang bahin, si Cebu City Mayor Michael Rama mibutyag nga kinahanglang di mapunta sa wala ang gilihok nga peace process sa Mindanao.
Ang Arsobispo sa Lipa, Batangas nga si Archbishop Ramon Arguelles nanawagan sa administrasyong Aquino nga hatagan og hustisya ang maong mga polis.
Gisaway usab niya si Aquino kay dili sensirong kasubo ang gipakita niini tungod kay mas giuna pa niini pagtambong ang pagbukas sa usa ka car show nungka sa arrival honors alang sa mga napatay’ng pulis.
Iyaha usab gipanawagan nga patun-an og balik ang gituki karon nga Bangsamoro Basic Law, matud niya dili balaod ang gikinahanglan sa mga Muslim sa Mindanao kundili, pamaagi sa paglambo sa ilang kahimtang sa pagpuyo.
Nanawagan hinuon si Arguelles sa katawhan nga dili basulon ang tanang Muslim sa nahitabo tungod kay mas daghang Muslim ang nagtamod sa pagtulun-an sa Kahitas-an.
Nag-abot dinhi sa Sugbo ang tulo ka mga Arsobispo nga sila si Archbishop Arguelles, Davao Archbishop Emeritus Fernando Capalla, Zamboanga Archbishop Romulo Dela Cruz ug Father Archie Intingan uban nila ni kanhi senador Kit Tatad, Former Defense Secretary Norberto Gonzales ug uban pang indibidwal.
Ania sila sa Sugbo aron sa padayong pagtuki ug pagplano alang sa National Transformation Council sa pagpadagan sa pangagamhanan. (Brenda Batuto, Decemay Padilla ug Sheilamie Medil,USJ-R Intern/EIM)(BANAT NEWS)
- Latest
