Imbestigasyon sa MCH sugdan na

CEBU, Philippines - Karong adlawa mohimo na sa ilang imbestigasyon ang Department of Health-7 labot sa nahitabo sa asawa ni Cesar Coliflores nga si Jocelyn kinsa namatay sulod sa Mandaue City Hospital sa giingong medical malpractice.

Dunay gi-umol nga fact finding team ang DOH-7 nga gilangkuban sa tulo ka medical doctors, usa ka abogado ug ubang staff sa health and licensing section sa maong buhatan.

Matud sa tigpamaba sa DOH-7, Ruth Suzette Jabonete, upat ka suwat ang ilang nadawat kini sa Commission on Human Rights nga nag-endosar sa kaso, suwat gikan sa abogado sa pamilya’ng Coliflores ug laing suwat gikan sa Mandaue City Hall ug hospital.

Dugang ni Jabonete nga sugdan nila ang pormal nga imbestigasyon ug hatagan nila og usa ka semana sa paghimo niini ilabi na nga gihatagan usab sila og mandato ni Regional Director Jaime Bernadas nga paspasan ang kaso.

Atol sa imbestigasyon tukion ang tanang detalye sa medical records ni Jocelyn aron masusi kun dunay lapso nga nahimo ang tambalanan sa pag-atiman sa ilang pasyente. (BANAT NEWS)