Speed limit sa SRP lisud ipatuman

CEBU, Philippines - Ang labaw’ng opisyal sa Land Transportation Office (LTO) sa rehiyon mitataw nga lisud ipatuman ang kamandoan ni Mayor Michael Rama nga dakpon kadto’ng mga drayber nga magpakusog sa pagpadagan diha sa SRP-Coastal Road kun walay speed gun ang mga traffic enforcers.

Si LTO-7 Regional Director Arnel Tancinco miingon nga walay lig-ong basihanan ang mga traffic enforcers sa pagdakop sa mga motorista bisan pa og ang ilang pagpadagan lapas na ang gikusgon sa 30 kilomerters matag takna.

Ang CITOM walay “speed gun” aron magamit ug maoy mosukod ug morekord sa gikusgon sa sakyanan ug masuta kun nakalapas ba ang motorista sa gilatid nga speed limit.

Gusto ni Mayor Rama nga kontrolahon ang dagan sa mga sakyanan nga moagi sa SRP-Coastal Road tungod sa sagunson nga aksidente nga nahitabo diha sa mao nga dapit ug daghan niini naglambigit og motorsiklo.

Matud sa mayor nga ang ubang aksidente nahitabo kay ang mga nagsakay og motorsiklo wala na makahinimbang sa pagpadagan ang drayber diha nga naagian og kusog kaayo’ng nagdagan nga sakyanan.

Gikan niadto’ng 2008, gikataho nga kapin sa 500 ka aksidente nga naglambigit og motorsiklo diha lang sa SRP. Sa ubang kanasuran, ang ilang mga highway guards hitsas og speed gun nga magamit aron pagsukod sa gikusgon sa dagan sa mga sakyanan nga mosubay sa ilang highway. Si Mayor Rama nangandoy nga unta adunay mga nagpakabana nga sibilyan o mga magpapatigayon nga modonar niini’ng mao nga kahimanan ngadto sa CITOM. Samtang ang mga sakop sa CITOM padayon nga mihimo og information drive aron masayod ang mga motorista sa bag-ong speed limit sa mga sakyanan nga moagi sa SRP. Gipanghatagan sila og mga “flyers” nga nagpahibalo nga ang gikusgon sa ilang pagpadagan kinahanglang dili molapas sa 40 kilometros matag takna.  (BANAT NEWS)