Nasunogan sa Basak-San Nicolas mag re-blocking
CEBU, Philippines – Human sa dakong sunog, plano karon sa dakbayan sa Sugbo nga usbon ang porma sa lugar nga nasunugan pinaagi sa re-blocking.
Matud ni Mayor Michael Rama nga ang kasikit sa mga balay ug kagamay sa dalan maoy hinungdan nganong nidako ang sunog.
Sa special session sa konseho sa barangay Basak San Nicolas kagahapon gideklarar ang sitio Colo Isla Alegre ubos sa state of calamity.
Matud ni Konsehal Norman Navarro, ang mohulip ni anhing kapitan George Rama, ang 134 ka pamilya nga biktima sa sunog makadawat pinansiyal nga hinabang gikan sa barangay nga nagkantidad og P1,000 ug tunga sa sako nga bugas. Ang barangay duna pa’y kapin usa ka milyon pundo sa calamity fund.
Samtang, madawat sa 30 ka tag-iya sa balay ang P10,000 nga hinabang ug P5,000 matag usa sa 52 ka mga nag-abang nga nagpuyo sa maong dapit gikan sa siyudad.
Base sa datus sa Department of Social Welfare and Services, 82 ka balay ang naugdaw sa sunog niadtong Lunes sa hapon.
Migawas karon ang report nga gipanag-iya sa usa ka pribadong tawo ang luna nga nasunugan apan daan nga giklaro sa mayor nga dili himuong rason ang sunog sa pagpahawa sa mga tawo sa ilang gipuy-an. – /EIM) (BANAT NEWS)
- Latest
