CH, tunghaan magsabot sa pagkanselar sa klase

CEBU, Philippines - Makig-estorya ang kagamhanan sa siyudad sa Sugbo sa mga representante sa colleges ug universities aron mahan-ay ang tamdanan sa pagsuspenso sa klase kun may bagyo o katalagman.

Si Atty. Jonathan Capanas, Dean sa College of Law sa University of San Jose-Recoletos, niduso sa draft protocol aron malikayan ang panagsungi sa lokal nga kagamhanan ug sa tunghaan panahon sa emerhensiya.

Kahinumduman nga nideklarar og suspenso sa klase si Mayor Michael Rama sa tanang level niadtong Disyembre 8 tungod sa bagyo’ng Ruby.

Apan ang University of the Philippines-Cebu ug USJ-R College of Law ang nagpadayun sa klase.

Tungod niini, gitahasan si Capanas sa kagamhanan sa siyudad sa Sugbo aron mo-draft sa maong protocol sa deklarasyon sa suspenso sa klase aron dili malibog ang publiko.

Matud ni City Attorney Jerone Castillo nga makigtagbo pa sila sa mga representante sa mga eskuylahan kun mosugot ba sila sa maong proposed protocol o dili.

Ubos sa proposed guidelines, ang deklarasyon sa pagsuspenso sa klase magbase kun asa ang location sa eskuylahan.

Matud ni Capanas nga ang mga eskuylahan nga duol sa mga flood-prone ug landslide-prone areas angay nga motuman sa deklarasyon sa pagsuspenso sa klase sa kagamhanan sa Sugbo.

Sugyot niya nga tanan klase sa college lakip ang graduate schools hingpit nga makanselar kun ang PAGASA moisyu og signal no. 3. Dugang niya nga kun adunay kanselasyon ug suspension sa klase, angay kini’ng ipahibawo alas 4:30 sa buntag o alas 11:00 sa buntag aron dali ra maka-aksyon ang mga eskuylahan. (BANAT NEWS)