Bana nangita’g hustisya

CEBU, Philippines -  Mangayo gyud og hustisya ang Overseas Filipino Worker (OFW) nga bana sa namatay nga pasyente sa Mandaue City Hospital nunot sa giingong sayop nga tambal ang gipa-inom.

Si Cesar Coliflores, bana sa namatay nga si Jocelyn, niingon nga gikompleto pa niya ang gikinahanglan nga mga dokumento alang sa pagsang-at og kaso.

Nidangop na siya sa buhatan sa Commission on Human Rights-7 ug gi-refer siya sa Department of Health-7 alang sa imbestigasyon nga himuon.

Si Roger Paller, public information officer sa kagamhanan sa dakbayan sa Mandaue, niingon nga si Mayor Jonas Cortes nimando na sa paghimo og imbestigasyon.

Matud ni Paller nga giawhag usab nila ang pamilya sa namatay sa pag-coordinate sa ilang City Legal Office.

Si Coliflores niingon nga wala siya makahigayun sa pagduso sa iyang reklamo ngadto sa kagamhanan sa dakbayan sa Mandaue.

Sukad sa hitabo, matud niya nga wala’y opisyal sa dakbayan nga nakigkita kaniya alang sa paghimo og pakisusi labot sa maong insidente.  (BANAT NEWS)