Wa na kapaninda naghikog
CEBU, Philippines - Patay na nga nakit-an sa guwardiya ang usa ka lalaki nga nag-abang og lawak sa Rafols’ Compound, dalan Aboitiz, Kamputhaw, dakbayan sa Sugbo human naghikog pasado alas 11 sa buntag sa nakalabay nga adlaw.
Ang nagpakamatay naila nga si Artemio Javing, 57, buwag sa asawa ug usa ka tindero og CD/DVD sa aseras sa Fuente Osmeña ug lumad nga taga Mindanao. Matud ni SPO4 Rey Cuyos, imbestigador sa homicide section sa Cebu City Police Office, nga ilang banabana duha na ka adlaw human naghikog patay si Javing gamit ang pisi.
Base sa nakuha nga impormasyon nga naguol si Javing nga wala na nakatinda gumikan sa wala masayri nga hinungdan ug naproblema kay daghan pa kini og para baligya.
Nakuha sa kapolisan ang suicide note ni Javing nga nag-ingon nga “naa ko’y kwarta sa roll-up. Gamita ninyo para sa akong bangkay pauli sa amo. Bye.” Si Cuyos niingon nga ang mga kauban sa giabangan nga balay ug ang caretaker ang wala sab nasayud kung asa sa Mindanao nagpuyo si Javing.
Duna na hinuon sila’y gipangtawagan nga mga pangan gikan sa cellphone sa namatay sa pamasin nga mga paryente. Ang kapolisan wala’y nakitang foul play sa hitabo. (BANAT NEWS)
- Latest
