Sayop ang gitambal?

CEBU, Philippines - Mosang-at og kasong malpractice batok sa doktor sa Mandaue City Hospital ang tagtungod sa pasyente’ng babaye nga namatay tungod sa katahap nga dili mao ang tambal nga gidapat.

Si Cesar Coliflores, bana sa namatay nga si Jocelyn, 40-anyos, niingon nga ang iyang asawa igo lang gihilantan. Kuyog sa pasyente ang 8-anyos ug 12-anyos nga anak lalaki ug babaye uban sa igsuon sab niini nga babaye sa pagpa-checkup sa Cortes General Hospital apan gi-refer kini ngadto sa City Hospital.

Didto sa tambalanan gihimo sa doktor ang pag-injection og tambal  apan namatay ang pasyente paglabay sa 30 minutos. Si Ricky Recla, bana sa ig-agaw nga babaye sa namatay, niingon usa ka doktor nga babaye nga naila lang nga Dr. Alcantara ang niluwat og resita apan dihang gi-injection na ang maong tambal kalit lang naglain ang pamati sa lawas niini.

Nunot sa paglain nga gibati sa lawas sa namatay nakahimo pa kini sa paghangyo sa 8-anyos nga anak lalaki nga kuhaan og video nga mahimo’ng ebidensiya sa nahitabo kaniya.

Ang 8-anyos nga bata nga nahinabi sa Banat News niingon nga nakita niya nga nagkurog ang iyang inahan nga nagtinguha gyud unta sa paggawas gikan sa pribado’ng lawak sa maong tambalanan ug hangtod nga namatay.

Si Dr. Milagros Espinosa, officer in-charge (OIC) chief sa tambalanan, niingon nga naghimo na sila og pasiuna nga imbestigasyon labot sa maong hitabo ug gipaabot lang nila ang pormal nga reklamo sa tagtungod sa namatay.

Si Mayor Jonas Cortes niingon nga iyang gipaabot ang resulta sa imbestigasyon sanglit mao kini ang iyang basehan sa lakang nga iyang himuon sa mga nalambigit nga medical personnel sa nahisgutang tambalanan.  (BANAT NEWS)