Land Transportation Office sa Looc ibalhin sa Subangdaku

CEBU, Philippines - Gikompirmar ni Mandaue City Mayor Jonas Cortes ang plano nga pagbalhin sa Land Transportation Office (LTO) district office sa barangay Looc ngadto na sa Motor Vehicle Inspection Service (MVIS) building sa barangay Subangdaku.

Matud ni Cortes nga nagpahibawo na kaniya si Engineer Eugene Gador nga maoy district office chief sa ilang plano nga pagbakante na sa gigamit nila’ng edipisyo nga gipanag-iya sa kagamhanan sa dakbayan.

Dugang ni Cortes nga iyang gipaabot ang hingpit na nga pagbakante sa edipisyo tungod sa pagpatuman sa plano nga gamitan sa edipisyo ug sa luna.

Si Cortes nipasabot nga nagkadaghan na ang binilanggo sa Mandaue City Jail.

Matud ni Cortes nga ang Mandaue City Jail iyang hatagan og kahigayunan sa paghimo og extention building alang sa mga binilanggo sa pagpaluag sa kasamtangan karo’ng kahimtang.

Si Chief Inspector Gil Inopia nga maoy jail warden sa Mandaue City Jail nga nahinabi sa Banat News niingon nga ang 1,500 kapin nila ka binilanggo dili na paigo sa gi-okupar nga bilanggoan.

Kini ang hinungdan nga daku ang ilang tinguha nga kadugangan pa ang mga selda sa Mandaue City Jail aron sa pagpaluag sa ilang kahimtang.  (BANAT NEWS)