Biktima sa trafficking tabangan

CEBU, Philippines - Pasakaan og kaso ang giingong mi-recruit sa 27 ka Sugboanong mananagat lakip na ang tag-iya sa fishing vessel nga ilang gikuyogan.

Ang mga mananagat gikan sa dakbayan sa Lapu-Lapu, duha sa lungsod sa Cordova ug usa ang gikan sa lungsod sa Tuburan nga nagpanuigon gikan sa 19 hangtud sa 59-anyos.

Usa kanila ang na-missing human gipalayat sa kapitan dihang ang  ilang pump boat gihapak sa dagkong bawod dihang nagdaot ang panahon.

Ang gipasakaan og kaso mao si Ramir Noval nga taga Marigondon, Lapu-Lapu City nga giingong maoy tag-iya sa panagatan ug usa ka giila lang sa pangalan nga “Boy” nga maoy giingong kapitan sa panagatan.

Buwan sa Septiyembre, 2014 dihang  gi-recruit sila ni “Boy” ug gipahuwam sila’g P15 mil ug P10 mil matag usa aron duna silay ibilin sa ilang mga pamilya. Gipasaligan sila nga daku ang ilang mabahin  sa halin sa makuha nga isda. Apan gikan sa ilang paglawig niadtong Nobiyembre 20, 2014  wa na sila makakita og isla  didto sa Palawan kay pirme lang sila sa lawod. Hinungdan nga nangita sila og paagi aron mapugos ila og dunggo pinaagi sa pagtuyo og gisi sa ilang pukot.

Buwan sa Disyembre dihang midunggo sila sa Sitio Sigumay, Barangay Dalit, Balabac Island sa Palawan ug didto sila nakapangayo og tabang  ug na-rescue sa mga sakop sa Philippine Navy. Si Gov. Hilario Davide III mipasalig nga tabangan sa Kapitolyo ang mga biktima. (BANAT NEWS)