Babaye giihaw

CEBU, Philippines - Patay ang usa ka   babaye nga kolektor sa lending human gigulgol ang iyang liog sa usa ka lalaki diha sa Barangay Langtad lungsod sa Argao.

Ang biktima naila nga si Maria Tita Piloton, 35, nagpuyo sa Poblacion, Argao ug lumad nga taga lungsod sa Dalaguete.  Samtang ang suspetsado giila nga si Rhine Jimenez, 28, nagpuyo sa maong lugar.

Ang kapulisan nagduda nga bangog sa drugas ang suspetsado ug tulis ang motibo niini kay nawala na ang sling bag sa biktima nga gituohang may sud nga kwarta.

Si Police Officer 2 Paulino Sanchez ang desk officer sa Argao Police nga nahinabi sa Banat News miingon nga posibling giplanohan na sa suspetsado ang krimen.

Usa ka residente nga nakalabay sa maong dapit  ang nakakita sa patay nga lawas sa maong babaye. Ug sa gihimong follow up operation, dunay nakahatag kanila og impormasyon nga si Jimenez miangkon sa iyang asawa nga kini nakapatay.

Ang asawa sa suspek miangkon sa mga polis nga miistorya kaniya ang iyang bana nga kini nakapatay   ug  gipakita pa niini ang nagkadugo nga kamot ug nagdala  kini og blue nga sling  bag.

Gitug-an sa asawa nga tiggamitan og drugas ang iyang  bana kinsa padayon pa karong gipangita.  (BANAT NEWS)