Armas, drugas nasakmit sa checkpoint
CEBU, Philippines - Gidakop sa kapolisan ang tulo ka pasahero sa taxi nga armado ug nagdala og ginadili’ng drugas atol sa usa ka security checkpoint sa sitio Suba Pana, barangay Subabasbas, dakbayan sa Lapu-Lapu niadtong Martes sa gabii.
Si SPO2 Candido Barinque sa Basak Police Station 4 niila sa mga nadakpan nga sila si Julius Andales, 29-anyos ug Joseph Bangalo, 20-anyos, ug ang ilang higala nga si Rochel Capuno, 35-anyos, kinsa pulos padulong sa lungsod sa Cordova.
Si Andales taga sitio Cansapac, Catarman samtang si Bangalo ug Capuno taga barangay Poblacion sa maong lungsod.
Gituohan nga gikan ang mga suspek sa siyudad sa Sugbo sakay sa taxi nga gimaneho ni Jeffrey Mandac kinsa wala’y kalibutan sa gipangdala sa iyang mga pasahero.
Nasakmit sa kapolisan ang usa ka .45 caliber pistol gikan ni Andales samtang laing .22 revolver ang nakuha gikan ni Bangalo.
Si Barinque nagkanayon nga gawas sa mga armas, nakuhaan sab si Capuno og siyam ka gagmay’ng pakete sa ginadiling drugas ug medium size nga shabu.
Gibalhug ang tulo ka suspek sa Lapu-Lapu City detention cell ug pasakaan sila si Andales ug Bangalo og illegal possession of firearms samtang si Capuno pasakaan og kaso sa paglapas sa Republic Act 9165 kon ang Comprehensive Dangerous Drugs Act of 2002.
Samtang 99 ka gagmay’ng pakete sa ginadiling drugas ang nasikop sa kapolisan atol sa buy-bust operation sa sitio Bagumbayan 2, Maribago, dakbayan sa Lapu-Lapu.
Matud ni Senior Inspector Verniño Noserale sa Mactan Police Station 2 nga pasado sa kadlawon sa niaging Lunes ilang nadakpan ang duha ka tiggamitan og ginadiling drugas nga sila si Necias Paquibot, Jr. ug Eric Pangatungan, pulos mga residente sa maong dapit. Adunay 86 ka gagmay’ng putos ang nakuha kang Paquibot ug 12 ka gagmay’ng pakete kang Pangatungan. (BANAT NEWS)
- Latest
