Ex-cop gipusil, kritikal

CEBU, Philippines - Kritikal ang kahimtang sa usa ka kanhi polis human gipusil sa sitio Maharlika, Sambag 2, dakbayan sa Sugbo sa niaging kadlawon.

Ang biktima naila nga si Roderick Garro, 39, nagpuyo sa Maguikay, dakbayan sa Mandaue.

Matud ni PO1 Joel Zamora sa homicide section sa Cebu City Police Office nga usa ka alyas Palaw nga nagpuyo sa maong lugar ang gitudlo’ng suspek sa hitabo. Gitug-an ni Zamora nga paingon na unta mosakay sa motorsiklo ang biktima kauban ang iyang duha ka amigo dihang kalit lang gipusil sa makadaghan nga higayun.

Igo sa nagkadaiyang parte sa lawas ang naangkon sa biktima nga dali nga gidala sa Vicente Sotto Memorial Medical Center (VSMMC).

Duna’y nakuha nga impormasyon ang kapolisan nga niadto sa lugar ang biktima aron unta makig-inom sa iyang higala sa lugar apan wala madayun hinungdan nga kini paingon na molakaw dihang gipusil.

Laing nasayran sa homicide section nga nanghingi sa maong lugar ang biktima hinungdan nga kini gipusil. “Nanghingi kuno ni didto, base sa initial nato nga investigation,” sigun pa ni Zamora.

Nakuha sa kapolisan sa crime scene ang lima ka basiyo sa caliber .45 pistol nga gituohang gigamit sa suspek.  (BANAT NEWS)